公開久違多年合體開騷內情 林子祥葉蒨文演繹各有準則

香港文匯報訊（記者 阿祖）將於10月登陸紅館舉行演唱會的林子祥（阿Lam）與葉蒨文（Sally），作客查小欣網上頻道訪問，細訴久違27年來未有合體開騷的背後原因。

明年結婚三十周年紀念，阿Lam與Sally預計將會在舞台上度過，Sally說：「之後可能會做巡演（《白頭到老演唱會》），將花年幾至兩年做，目前我哋首先做好香港呢五場！」原來香港站之後，他們還會作全球巡演。阿Lam與Sally擁有無數經典金曲，歌單編排上會否很傷腦筋？阿Lam氣定神閒地說：「我哋多歌仲易『襯』，將啲歌分一個一個類別，例如電影歌、中式歌，你一講咩歌我哋都有，就將佢哋『襯』埋，一嚿嚿直落去唱！」Sally問阿Lam：「我哋好多都係合唱嘅歌，我可以唱你嘅歌，你有冇唱我嘅歌？」阿Lam快速回答：「《零時十分》！」提到《選擇》也一定要唱吧？Sally自爆：「嗰時我唔係好知道《選擇》歌詞講乜嘢，我只知道歌名係《選擇》，但過咗咁多年，如果以前嘅『選擇』係我同佢，現在嘅『選擇』係我哋同舞台、觀眾，係一個大好多嘅愛，唔係咁窄嘅範圍。」

久違27年，阿Lam與Sally再合體舉行演唱會，阿Lam細說箇中原因：「咁耐冇一齊做，我諗係因為佢好長時間要照顧爹哋媽咪，之後輪到我照顧媽咪，所以時間夾唔埋！」今次演唱會，兩夫婦與主辦單位商討接近兩年，合約更有28頁紙，主力由Sally處理，Sally笑言：「真係暈，好在我哋有一個非常厲害嘅律師，因為咁多年我哋都冇乜簽合約，今次有咁多場、去到咁遠，所以有必要簽！」Sally是緊張大師，樣樣執到正，每個細節力求精準；阿Lam看似慢條斯理，實則亦有注重細節的地方，阿Lam說：「我諗我同佢嘅進度係好唔同，因為我放鬆晒來做，我可以用唔同方法去唱呢隻歌，我覺得咁樣先至係創新，唔係困住自己；佢（Sally）就要每一粒音、每一盞燈、每一樣嘢都要啱晒，所以我哋咁耐冇一齊做（演唱會）！」